Башҡортостан ҡурай еләге – С витамины буйынса рекордсы

«Тикшеренеү мәғлүмәттәре буйынса, аскорбин кислотаһы бүленеп сығыуға сорты, үҫтереү технологияһы, үҫеү урыны ғына түгел, һауа шарттары ла йоғонто яһай. Баҡтиһәң, С витамины температура амплитудаһы ҙур һәм яуым-төшөм аҙ булған төбәктәрҙә күберәк бүленә. Шул иҫәптән ул Башҡортостан биләмәһе», — тип һөйләнеләр Башҡортостан ауыл хужалығы ғилми-тикшеренеү институтында.

«Ҡурай еләге ултыртыу өсөн иң ҡулай ваҡыт – көҙ. Яҡты һәйбәт төшкөн участкаға бер погон метрға өсөшәр-дүртешәр үҫенте ултыртабыҙ, яҡшылап һыу һибәбеҙ. Улар бер йылдан емеш бирә башлай. Емеш биреп бөткән шытымдарҙы емеш биргәс тә алып ташлау хәйерле. Шытымдарҙың ҡуйырыуына юл ҡуйырға ярамай», — тип кәңәш бирҙе селекция үҙәгенең өлкән ғилми хеҙмәткәре Венера Зарипова.