Үткән тәүлектәрҙә республикала өс урында урман янғыны теркәлгән. Ут 14 гектар ерҙе ялмап алған. Бөгөнгә ул һүндерелгән. Шулай ҙа беҙҙә янғын хәүефе ҙур булған райондар байтаҡ. Күреп тораһығыҙ - эҫе, томра, ямғыр ҡайһы бер төбәктәрҙә бер ай яуғаны юҡ.
Юғары, дүртенсе хәүеф зонаһы тип түбәндәге райондар билдәләнгән: Әбйәлил, Баймаҡ, Бәләбәй, Бөрйән, Йылайыр, Күгәрсен, Көйөргәҙе, Мәләүез, Стәрлебаш, Учалы, Федоровка. Бына ошо төбәктәрҙә урман "былт" итеп тоҡанырға ғына тора.