Кем онотоп ҡалдырған?

Пассажирҙар нимәләрҙе йыш онотоусан? Кейем-һалым, планшеттар, электрон китаптар, зарядка ҡорамалдары, документтар, хатта... сумаҙандар. Ишкәк, үтек, теген машинаһы, дипломат, ишетеү аппараты кеүек табыштар компания хеҙмәткәрҙәрен хайран ҡалдыра.

“Башинформ” агентлығы алған мәғлүмәттәр буйынса, поезда йорт хайуандарын да онотоп ҡалдыралар. Был саҡта хеҙмәткәрҙәргә хәтерһеҙ хужаларға оператив рәүештә сығырға, йәнлектәрҙе тиҙерәк өйҙәренә ҡайтарырға тура килә. Табылған аҡса, документтар һәм әйберҙәр маршруттың аҙаҡҡы станцияһында полиция бүлегенә тапшырыла.

Әгәр һеҙ нимәнелер онотоп ҡалдырһағыҙ, “Рәсәй тимер юлдары” асыҡ акционерҙар йәмғиәтенең рәсми сайтына инеп, электрон заявка биреп ҡалдыра алаһығыҙ. Тик әйберегеҙҙе юғалтҡандан һуң бер ай эсендә хәбәр итергә тырышығыҙ. Заявкағыҙға өс көн эсендә яуап ҡайтарасаҡтар.

bash.rbsmi.ru