Теләк буйынса матурлыҡ (хикмәтле хикәйәт)

Йәш егет бер нисек тә үҙенә тормош юлдашы таба алмай йонсой: йә ҡыҙ ул теләгәнсә матур булмай, йә буй-һыны бик үк күңеленә ятмай, йә бик ябыҡ. Йә үтә ныҡ һимеҙҙәр осрай. Әммә бер ваҡыт егет үҙенә ярҙам ҡулы һуҙырға һәм уның был мәсьәләһен сисешергә риза булған талсымсыны осрата.

- Бына һиңә шырпы, - тип егеттең ҡулына тотора тылсымсы. – Әгәр өйләнергә ваҡыт етте тип уйлаһаң, ошо шырпыны берәй ҡыҙҙың алдында һындыр, һәм ул әкренләп гүзәл ҡыҙға әйләнә башлар.

Тиҙҙән егеттең дуҫ-иштәре лә, туған-тыумасалары ла уның бер ҡыҙ менән осрашыуын һиҙә. Ә ҡыҙ, ысынлап та, көндән-көн матурлана һәм һөйөмлө була бара икән. Күп тә үтмәй улар өйләнешә.

Тик бер йыл үтеүгә бөтәһе лә ҡыҙҙың йәмһеҙләнә башлауын күрә. Йөҙө лә, буй-һыны ла насар яҡҡа үҙгәргән кеүек тойола. Быға бөтәһенән дә бигерәк егеттең йәне көйә. Ул нисек тә теге тылсым эйәһен табырға теләй һәм уны осрата ла:

- Һин ниңә мине алданың! Тылсымың башҡаса эшләмәй! Ни өсөн?! – тип ҡысҡыра.

- Ул эшләүҙән туҡтаманы, - ти тыныс ҡына тылсымсы. – Һин һайлаған ҡыҙҙың тышҡы ҡиәфәте үҙең теләгәнгә тап килә. Тик һин унан ниндәйҙер кәмселек эҙләй башланың...

“Башҡортостан календары”нан.