Белореттарҙың тәүге 50 дроны әҙер

Алдан хәбәр итеүебеҙсә, Белорет ҡалалаһында эшҡыуар Данис Йыһаншин махсус хәрби операциялағы егеттәргә ярҙам итеү маҡсатында дрондар етештереүҙе ойошторҙо.

Уның һүҙҙәренсә, бер миллион һумға 34-те йыйырға мөмкин. Аҡсаны Белорет районы һәм ҡалаһы халҡы, эшҡыуарҙар ярҙамы менән йыйҙылар. Тәүге дронды октябрь башында һынап ҡаранылар һәм белореттар тәҡдиме буйынса уны “Бөркөт” тип атанылар.

Ошо көндәрҙә Данис Сәйетмырҙа улы һөйөнөслө яңылыҡ менән уртаҡлашты – тәүге 50 дрон әҙер.

– Беҙ уны эшләнек! Белоретта “Алтын бөркөт” дрондарының ҙур партияһы әҙер. Был проектҡа ҡағылышы булған, ышанған, аҡсалата, кәңәше, яҡшы һүҙе менән ярҙам иткән һәр кешене ҡотлайым. Дрондарҙы йыйыуҙа ҡатнашҡан һәр белгескә айырым рәхмәт әйтәм. Был беҙҙең уртаҡ ҡаҙаныш!

Ауырлыҡтар һәм ҡаршылыҡтар күп булды, әммә хәҙер беҙ барлыҡ юлды беләбеҙ һәм уны тағы ла үтергә әҙербеҙ. Яҡын арала дрондарҙы егеттәргә алып барам. Улар “ҡоштарҙы” бик көтә.

Әле проект тамамланмаған: барыһы ла аңлай, ял итә торған ваҡыт түгел, – тине Данис Йыһаншин.

Эшҡыуар белдереүенсә, дрондар йыйыу артабан да дауам итәсәк, шуға ла комплект деталдәр өсөн аҡса йыйырға кәрәк. Һеҙ ҙә был проектта ҡатнаша алаһығыҙ. Бының өсөн Һаҡлыҡ банкы картаһына – 4279060015596729 аҡса күсерергә мөмкин. Тәғәйенләнеше: “Поддерживаю своих”.

Фото: vk.com/danis_yaganshin.