Өфөлә иң сибәр башҡорт Ҡарһылыуҡайҙар һайланды

«Финалда республикабыҙҙан 30 Ҡарһылыу ҡатнашты, — тине конкурстың директоры Айгөл Үтәгәнова. — Әммә уларҙың яртыһы — 11 йәшкә тиклемге ҡыҙҙар призлы урындар өсөн ҡатнашманы, сөнки беҙ традиция буйынса бөтә балаларға ла гран-при тапшырабыҙ. Ә төп бүләктәр — Рәсәй һәм халыҡ-ара матурлыҡ конкурстарында ҡатнашыу өсөн 12-17 һәм 18-18 йәшлек һылыуҡайҙар үҙ һәләтен күрһәтте».

Өлкән ҡатнашыусылар араһында гран-приға Волга дәүләт һыу транспорты университеты Өфө филиалының 2-се курс курсанты Ангелина Баркутова лайыҡ булды. Ул Дамира Сәйетованың репертуарынан йыр башҡарҙы һәм үҙ халҡының мәҙәниәтенә, йолаларына булған һөйөүе хаҡында һөйләне.

Юниорҙар араһында Учалы уҡыусыһы Элиза Фәйзуллина «Ҡарһылыуҡай» исемен алды. Уның күңелгә үтеп инерлек «Торналар» бейеүе бер кемде лә битараф ҡалдырманы.

Башҡа ҡатнашыусылар призлы урындарҙы үҙ-ара бүлеште. Өлкәндәр араһында беренсе урынды — Әбйәлил районынан Гөлминәз Ғүмәрова, ә икенсе урынды Эльвира Ғарипова яуланы. Уҡыусыларға килгәндә, беренсе урынды Данилина Кузиәхмәтова һәм Аделина Ганьшева алды. Икенсе урынға Азалия Кинйәбулатова, Милана Хәйбуллина, Арина Ғәлиева һәм Азалия Яҡшыгилдина лайыҡ булды. Самира Кучаева, Камилла Әбүбәкерова, Анастасия Кошевая, Азалина Мортазина, Ангелина Яҡупова, Алтынай Хашимова һәм Регина Миңлеғолова 3-сө дәрәжә диплом менән бүләкләнде.

Барлыҡ ҡатнашыусыларға ҡулдан эшләнгән затлы дизайнер таждары, киң таҫмалар һәм иҫтәлекле сувенирҙар бүләк ителде. Шулай уҡ сараның бағыусылары еңеүселәргә һәм ишле ғаиләнән Анна Куликоваға махсус бүләктәр әҙерләгәйне.

Проектта ҡатнашыусыларҙы киләһе этап — 6 ғинуарҙа Мәскәүҙә «Рәсәйҙең милли Ҡарһылыуы» гранд финалы көтә.

Бынан алдараҡ «Башинформ» Өфөнән 12 йәшлек Регина Хужинаның конкурстарҙа ҡатнашыуы һәм тиҫтерҙәренә ярҙам итеүе тураһында хәбәр иткәйне.

https://www.bashinform.ru