Тиҙҙән оҙайлы ялдар башлана

Быйылғы уҡыу йылындағы иң оҙон сирек 27 мартта тамамланасаҡ.

Башҡортостан Мәғариф министрлығы башлығы Илдар Мәүлетбирҙин яҙғы каникул тураһында белдерҙе.
- 28 марттан уҡыусыларҙы яҙғы каникулдар көтә, ул 5 апрелгә ҡәҙәр дауам итәсәк, – тип һөйләне министр.
Министр билдәләп үтеүенсә, ҡалған уҡыу аҙнаһында клас етәкселәренә балалар менән һыу буйындағы, ҡар ирегән ваҡыттағы хәүефһеҙлек, шулай уҡ юл ҡағиҙәләрен үтәү тураһында һөйләшергә кәңәш ителә.
– Ата- әсәләргә элеккечә үк балаларын каникул ваҡытында эш менән тәьмин итергә, шулай уҡ башланғыс клас уҡыусыларын өйҙә яңғыҙ ҡалдырмаҫҡа кәңәш итәбеҙ, - тип мөрәжәғәт итә ул ата-әсәләргә. - Туғыҙ көнлөк каникул балалар һәм ата-аналар өсөн ысын яҙғы ял булһын, яңы көс менән уҡырға керешһендәр.
Илдар Мәүлетбирҙин шулай уҡ 2025-2026 уҡыу йылының 26 майҙа тамамланасағын иҫкәртте.

Башинформ.