Бында фәнни донъяға ҡараш һәм тикшеренеүҙәр мәҙәниәте формалаша

3 июндә Башҡортостандың Евразия ғилми-белем биреү үҙәге “Ғилми остазлыҡ” квалификация камиллаштырыу программаһын башлай. Унда юғары уҡыу йорттары уҡытыусылары, ғилми хеҙмәткәрҙәр һәм йәш ғалимдар ҡатнаша ала.

Сараны ғәмәлгә ашырыу Фән һәм технологиялар ун йыллығының “Фән эргәлә” инициативаһы (инициатива “Наука рядом” Десятилетия науки и технологий) сиктәрендә бара, тип хәбәр иттеләр республиканың “Фәнни-белем биреү үҙәге”нең идара итеүсе компанияһында.

– Яңы быуын тикшеренеүселәрен әҙерләү белем тапшырыуҙың аныҡ төҙөлгән системаһынан башлана. Тәжрибәле ғалим остаз булғанда, ул приборҙар менән эшләргә йәки гранттар яҙырға ғына өйрәтмәй – ул фәнни донъяға ҡараш һәм тикшеренеүҙәр мәҙәниәтен формалаштыра. Республикала “уҡыусы-уҡытыусы” бәйләнеше нығыраҡ булған һайын, асыштар һәм технологик суверенитет өсөн нигеҙ нығыраҡ буласаҡ, — тип билдәләне Башҡортостандың Фән һәм юғары белем биреү буйынса дәүләт комитеты рәйесе Светлана Мостафина.

Фәнни-мәғариф мөхитендә менторҙарҙың белем базаһы һәм тупланған тәжрибәһе бар, уларҙы белем алыусыларға тапшырыу мөһим. Тап ошондай остаздар аша йәш таланттар үҫешкә импульс ала һәм үҙҙәренең фәнни эшләнмәләрен тормошҡа ашыра.

– Ғилми состав өсөн квалификацияны камиллаштырыу буйынса программаны беҙ өсөнсө йыл рәттән үткәрәбеҙ. Былтыр 29 ҡатнашыусы үҙ компетенцияларын һәм белем базаһын арттырҙы – 2024 йылға ҡарағанда 11 кешегә күберәк. Беҙ был сараны мөмкин тиклем күберәк ғалимдарҙың остаздың компетенцияһын күтәреү, тупланған белемде һәм тәжрибәне йәш белгестәргә һөҙөмтәле тапшырыу, шулай уҡ уларҙың фәнни идеяларын тормошҡа ашырыуға булышлыҡ итеү өсөн ойошторабыҙ, – тип белдерҙе Башҡортостандың донъя кимәлендәге Евразия ғилми-белем биреү үҙәге директоры Андрей Кулаков.

“Ғилми остазлыҡ” барышында ҡатнашыусылар коммуникатив күнекмәләр һәм белгестәр әҙерләү тураһында белемде арттырасаҡ, уҡытыусы ниндәй кимәлдә кәрәклеген тикшерәсәк, грант мөмкинлектәрен эҙләү, финанслау һәм башҡа мәсьәләләр тураһында беләсәк.

Уҡыу көндөҙгө форматта 16 академик сәғәт дауамында Евразия ғилми-белем биреү йортонда үтә.

Төп баҫым остаздарҙың идара итеү компетенцияларына һәм ойоштороу күнекмәләренә яһала. Курсты тамамлағандан һуң ҡатнашыусылар телдән һорау алыу формаһында йомғаҡлау аттестацияһы үтә һәм квалификация камиллаштырыу тураһында таныҡлыҡ ала.

Фото: nocrb.ru/nit/tpost.