Эҫе көндәрҙе нисек үткәрергә?

Йәйҙең тәүге айында көндәр һалҡыныраҡ торһа ла, июль етеү менән эҫе көндәр башланды. Әммә ҡыуанысы менән бер рәттән хәүефе лә бар, сөнки йәйге селлә барыһына ла килешеп бөтмәй.

- Ҡояштың иң йомарт сағы 11 сәғәттән 17 сәғәткә тиклем тура килә, шуға ошо ваҡыт арауығында урамға сыҡмау яҡшыраҡ.

- Урамға асыҡ төҫтәге иркен кейем кейеп сығығыҙ. Эшлекле ҡатын-ҡыҙҙарға - һылашып торған костюм, ир-егеттәргә пинжәк һәм галстук тураһында онотоп торорға кәрәк.

- Ҡояштан һаҡланыу өсөн ҡулсатыр һәм бай кейеме алығыҙ.

- Бүлмәне һыуытып тороғоҙ. Кондиционер булһа, бик яҡшы, әммә иң түбән температураға көйләһәгеҙ, һыуыҡ тейҙереүегеҙ бар. Тыштағы температура менән айырма 6-8 градустан артмаҫҡа тейеш. Шулай уҡ һалҡын һауа ағымы туранан-тура һеҙгә йүнәлтелмәһен. Кондиционер булмаған осраҡта вентилятор ҡулланығыҙ.

- Йышыраҡ йылы ғына душ йәки ванна инһәгеҙ, эҫене еңелерәк үткәрерһегеҙ. Тәндән тир һәм туҙанды йыуып төшөргәс, тире “тын ала” һәм кеше еңеллек тоя. Һалҡын душ ҡына эҫенән ҡотҡара ала тип һанаусылар яңылыша. Ҡыҙған тәнгә һыуыҡ һыу тейһә, ҡан тамырҙарының киҫкен ҡыҫылыуына килтерә. Был айырыуса йөрәк һәм ҡан тамырҙары сирле кешеләргә бик зыянлы, хатта йөрәк өйәнәге булыуы ихтимал.

Нимә эсергә?

Белгестәр әйтеүенсә, йәйге селләлә һыуһынды ҡандырған иң яҡшы эсемлек – ул һыу. Уға лимон йә ҡыяр киҫәген өҫтәргә мөмкин.

Һыуһынды баҫыр өсөн сәйҙе һыуҙан 1/3 өлөш кәмерәк эсергә кәрәк. Былай иткәндә, эсеү теләге тиҙ баҫылыр. Иң ҡулайлыһы каркаде һәм йәшел сәй һанала. Уны йылыраҡ итеп, шәкәрһеҙ эсһәгеҙ, яҡшыраҡ булыр.

Кеүәҫ эшләп эсергә була: 10 литр һыуға 1–1,2 кг арыш икмәге, 20 г ҡоро сүпрә, 300 г шәкәр ҡомо алына.

Иң тәүҙә арыш икмәген телемләп киҫеп, табаға теҙәбеҙ. Ҡыҙған мейестә киптереп, сохари эшләйбеҙ. Кипкән икмәк өҫтөнә, ҡайнар һыу ҡойоп, 4–5 сәғәт ултыртып торабыҙ. Һуңынан сүпрә, шәкәр һалып, йылы урынға әсетергә ҡуябыҙ. Бер тәүлектән әсегәс, кеүәҫте һөҙөп алып, һыуытҡысҡа ҡуйырға кәрәк.

Ә бына татлы газлы эсемлектәр эҫе көндәрҙә сәләмәтлек өсөн үтә хәүефле икән. Составында шәкәр күп булғанға күрә, улар организмды тағы ла нығыраҡ һыуһыҙландыра, ти, диетологтар.

Беҙҙең халыҡ иһә элек-электән айран, ҡымыҙ, төрлө үлән сәйҙәре менән һыуһынды баҫыр булған. Шуның менән организмды көс-ҡеүәт менән тулыландырған, иммунитетты нығытҡан.

Ризыҡҡа айырым иғтибар итегеҙ. Ыҫланған, ҡыҙҙырылған һәм тоҙло аҙыҡтарҙы сикләргә, табиптар тәғәйенләгән дарыуҙар эсеү режимын теүәл үтәргә кәңәш ителә.Тиҙ үҙләштерелә торғанына, емеш-еләккә өҫтөнлөк бирегеҙ, айырыуса ҡарбуз, ҡауын, алма ашау яҡшы. Майлы, ауыр аҙыҡтан баш тартығыҙ.